SULAP

Sulap

Poinsumpak pintaliban ko
Olungui korohiyan ko
Susuton om undorongon
Opiton mirumo-rumo milonsoi-lonsoi
Raramayon om pitombuluyan

Ika kasarahan pinirubaan
Kinosunion wusak piombolutan totulid
Pisaramaan mitabi misuau
Olumis kirop wuros ngingis nu
Kosorong kosulu ginawo
Miagal bunga tolundus nga tanom do wokon

Tadau gumanti ulan toun tumalib
Kolumpatiu ginawo….. piupus
Kopulas katatak katabas piombolutan
Mingkurios pomusarahan mada kararad
Langad morou sorou kosolot tundu-undu
Kolomi ginawo guminawo dika
Norikot ongungut katalob wayaan
Ti komoyon miginawo amu kolombus
Nokosungkad id saralom ginawo
Miupus misorou ngaso kotoliban
Kuroyon kitansar misuai pularan palad
Amu kopisonggol id tinipi nopo
Sopirati ginawo pakadada

Sulap
Ika sasi wotik piginawaan
Siou piginawaan omu kopituluk
Poingkangkab abahang po id ginawo kada talupo
Miagal dika sulap … apanggor poingwakas po
Siliho kito ti susuyan ralan koposion

Dii Roselin Juidi Kg Kobulu Kinarut Papar

Tanak Koupusan (Anak kesayangan)

Tanak koupusan

Kosiwatan id doros nu tadau po untobon
muuduntuk po ruol suang tundu undu
suabino ramayon ko miampai pili nu
ika nakagayat ginawo dau
isio pinatalang id sawat maganu dika

tolud pinanau kinosukodon
mingihum mogihum dali kosoit
koturubung do tontok tinan
lumis lundus ginawo nu nakasakat ginawo dau
ika nakagabus tundu undu pilio ko

tingadan id sawat
pinopiontok dikoyu ngoduo

yoku pinagalasan pinopopi dika toruhai
kanu nopo mamarayou popologos
baino miganding ko id sahau do mimangun
midandi koposion selajur daa mikoruhang
ika tanak koupusan ku toririmo

Wonsoi di: Roselin Juidi